MANIFESTO POLA PROTECCIÓN DA SAÚDE DE TODOS OS TRABALLADORES E DOS MENORES

A ciencia demostrou de xeito inequívoco que a exposición ao fume de tabaco é causa de mortalidade, doenza e discapacidade, e que non existen niveis seguros de exposición. En España, o tabaco é a principal causa evitábel de morte, con máis de 3.000 falecementos ao ano por doenzas relacionadas coa exposición ao fume de tabaco alleo, polo que ten unha tremenda repercusión na política sanitaria, social, económica e ambiental.

A Lei 28/2005, de medidas sanitarias fronte ao tabaquismo, supuxo que unha boa parte da poboación española vise reducida a súa exposición ao fume de tabaco alleo, sobre todo nos seus lugares de traballo. Porén, este beneficio non atinxiu por igual a todos os cidadáns, xa que a súa redacción incluíu excepcións e ambigüidades que deixaron desprotexido o numeroso colectivo de traballadores dos sectores da hostelaría e a restauración, circunstancia que fai dubidar da súa constitucionalidade.

A norma tamén provocou unha discriminación entre os empresarios destes sectores, outorgando a uns o dereito a decidiren sobre a posibilidade de se fumar nos seus locais mentres que a outros se lles nega en base a un requisito que só pode ser considerado arbitrario. Entre os obxectivos prioritarios da lei estaba a protección da saúde dos menores e cortar o seu acceso ao tabaco, pero non impediu que estes seguisen estando expostos ao fume de tabaco alleo en bares e restaurantes ou nos seus propios fogares, nin complicou excesivamente a posibilidade de que puidesen adquirir tabaco en numerosos puntos de venda.

Se ao exposto se engade un feble ou inexistente control por parte das autoridades responsábeis, unhas interpretacións das ambigüidades da norma case sempre desfavorábeis para os non fumadores e unha nula coordinación entre autoridades sanitarias, outros departamentos das administracións e os corpos e forzas de seguridade, o panorama que se albisca é sombrío.

Por iso, os abaixo asinantes MANIFESTAMOS que, tendo en conta:

- os dereitos recoñecidos pola Constitución española,

- a lexislación en materia de Prevención de Riscos Laborais,

- a Convención sobre os Dereitos do Neno e o Convenio Marco da Organización Mundial da Saúde para o Control do Tabaco, ambas normas ratificadas por España,

- a resolución do Parlamento Europeo sobre o Libro Verde "Cara a unha Europa sen fume de tabaco: opcións políticas a escala da UE", presentado pola Comisión Europea,

- as moi positivas experiencias de cada vez máis países que adoptan lexislacións protectoras en todo o mundo e, moi especialmente, dos nosos veciños europeos, que resaltan a obsolescencia e a ineficacia da actual norma española,

- o nulo impacto económico da prohibición de fumar en bares e restaurantes, demostrado pola experiencia doutros países,

SOLICITAMOS

Ao Goberno de España e aos Gobernos das Comunidades Autónomas que inicien urxentemente os trámites necesarios para adaptaren a nosa lexislación ás obrigas que se contraeron ao ratificar o Convenio Marco da OMS para o Control do Tabaco, de maneira que

- se proporcione protección universal contra a exposición ao fume de tabaco alleo sen contemplar excepcións, evitando ambigüidades e listas de lugares, e dando cobertura a todos os cidadáns, especialmente aos menores en calquera circunstancia, como mínimo en todos os lugares públicos ou non públicos de uso colectivo que sexan interiores, fechados ou semifechados, incluídos vehículos, e nalgúns lugares públicos ao ar libre onde as persoas deban permanecer durante un certo tempo ou que sexan de uso habitual por menores,

- se limiten os puntos de venda de produtos do tabaco á rede de estancos do Estado, con expresa prohibición de acceso dos menores ás mesmas,

- se identifique claramente as autoridades responsábeis do seu control e inspección e se facilite a colaboración cidadá na observancia da lei permitindo denunciar os incumprimentos da forma máis sinxela e á autoridade máis próxima,

- se tomen as medidas económicas pertinentes para que o tabaco saia do cálculo do Índice de Prezos ao Consumo e se incrementen os impostos sobre o tabaco para nos pormos ao nivel dos países da nosa contorna, como mínimo, co obxectivo de reducir drasticamente o acceso dos menores e para deixar de "boicotear" as políticas sanitarias dos nosos veciños e perder a vergoñosa e desleal condición de "estanco de Europa".

Desde a nosa condición de sociedade civil convidamos toda a cidadanía a que faga seu este manifesto e exiximos aos nosos Gobernos central e autonómicos e aos nosos representantes parlamentarios que leven a cabo as medidas executivas e lexislativas necesarias para levar á práctica as peticións arriba expostas.